«Annou donn sipor bann madanm otour nou e annou annan respe pour zot»
«Le 8 Mars i sa zour sak lannen ki lemonn antye i selebre bann madanm. I osi en zour kot lemonn antye i ganny envite pour reflekte lo bann lakonplisman e kontribisyon madanm dan lemonn. Bokou aktivite in prepare pour obzerv sa zour, avek lentansyon enspir bann madanm e osi enspir sanzman kot i devret annan dan kominote, anver madanm.
«Mon pran sa loportinite ozordi pour selebre nou bann madanm dan Sesel. Zot prezans i anmenn bokou lanmour ek lazwa dan lemonn. Zot en sours lenspirasyon pour lafanmiy ek lasosyete; zot kouraz, menm dan bann moman difisil, i en legzanp pour lemonn antye.
«Annou servi sa lazournen konman en loportinite pour fer refleksyon lo fason ki nou kapab siport nou bann madanm pour akonplir plis dan lemonn. Annou donn sipor bann madanm otour nou e annou annan respe pour zot.
«Bann madanm, annou pran byen nou responsabilite. Nou misyon i nob! Annou pa dekouraze letan nou fer fas avek difikilte. Siport en lot ki’n tonbe e ede pour ranforsi bann valer dan nou fanmiy e lasosyete. Annou vin pli solider avek kanmarad e veye ki manyer nou koz lo enn a lot.
«Annou pa kree sitiasyon pour fer soufer nou kanmarad akoz sa ki nou senmen i sanmenm ki nou rekolte. Alor annou toultan sey nou mye pour fer sa ki byen.
«Ki Bondye i beni nou.»
