27.02.2017 Progranm Volontarya Pou Bann Zenn In Lanse Ozordi.
Vis Prezidan Vincent Meriton in ozordi lans progranm CEPS Youth Volunteers Progranm.
Vwala ladres fer par Vis Prezidan Meriton pou sa lokazyon.
Diskour Par Vis Prezidan Vincent Meriton
Envite Distenge
Myse Madanm Manmzel
Ser Zenn
I ankourazan pou en pei ler I vwar son lazenes aktiv e konsyansye. I pozitiv pou nou kominote, ler lazenes I vin devan, pare pou kontribye.
Ozordi, Sesel I vwar vizaz son bann vre zenn.
E Ozordi mon salye zot pou montre ki zenn Seselwa pa pe drive, ki se zot ki reprezant sa nouvo
zenerasyon vibran e ranpli avek lenerzi ki pou anmenn Sesel pli devan.
Me Ozordi, pa zis lazenes ki nou devret rekonet. Parey nou tou nou konnen, zenn I touzour bezwen siport e gidans. Zot merit lankourazman e bon lankadreman pou reisir. Paran, ansenyan e lezot manm kominote I kapab fer en gran diferans.
Ozordi, nou pe osi vwar lenportans en sosyete sivil ki dinamik e inovativ.
Mon felisit CEPS pou sa linisyativ.
Se sa kalite langazman ki nou bezwen si nou anvi adres bann diferan defi ki devan nou. Gouvernman lo li tousel pa kapab rezourd tou problenm. Gouvernman lo li menm napa tou solisyon.Nou bezwen alor plis kolaborasyon, plis kordinasyon e plis partenarya pou ki nou anmenn en lapros ini dan fason ki nou vwar e adres bann defi ki nou vwar otour nou.
Mon kontan alor vwar ki 2 lafors mazer nou sosyete in zwenn ansanm e pe kolabore pou byenet Sesel. Lazenes I lavenir e ler ou azout zot lafors avek bann kalite ki sosyete sivil I reprezante, mon konvenki ki nou pou vwar en diferans.
Avan mon terminen, les mon dir sak zenn ki isi ozordi ki sa progranm ki zot pe anbark lo la pou enn ki pou anmenn enorm benefis dan lavi lezot. Dan plizyer domenn e lenstans, zot pou aprann valer partaz zot letan avek lezot. Zot pou apresye lenportans donnen san ekspekte ganny okenn keksoz an retour.
Zot pou realize ki zot kapab fer en diferans, ki zot annan dan sakenn de zot sa potansyel pou anmenn sanzman pozitiv dan bokou sitiasyon. Me konnen osi, ki kantmenm ki travay volonter pa peye, I en aktivitie ki pou anrisir zot karakter e personalite.
Ozordi zot konmans sa progranm avek leker inosan me avek gran dezir pou partaze e kontribye. Dan 12 mwan, ler zot poun konplet sa parkour, zot pou’n matir, zot poun devlop bann kalite ki pou ed zot kominik pli byen, zot poun ganny plis konesans, kapab adapte avek diferan sirkonstans lavi e avek diferan personalite imen.
Dan 12 mwan, zot pou’n ganny leksperyans ki pou servi zot pou larestan zot lavi. Leksperyans pratik ki okenn kors pa kapab montre zot.
Pou terminen, les mwan remersi CEPS ankor pou sa lagazman serye ki pe gany demontre atraver sa progranm zenn volontrya isi zordi.
Gouvernman I rekonet travay signifikan ki zot pe anmennen pou byenet nasyon Seselwa e mon le reassir zot ki tou zefor posib pou gany fer pou ranforsi sa bon kolaborasyon ki nou’n develope dan sa bann derneyn lannen.
Mon swet tou zenn kouraz e sikse dan sa latas nob ki zot in angaz zot ladan.
Mersi.
